唔知大家有無睇過「四人歸西」呢個鬼故？講嘅就係麻雀枱上唔可以連續4次打出「西」呢隻牌，如果唔係就會撞邪，最後4個人一齊死於非命。同麻雀有關的鬼故又點止咁少，話說响50年代香港油麻地發生嘅一單轟動全城的鬧鬼案，引嚟過千市民圍觀事發單位嘅新聞。

據《工商日報》報道，1953年3月4號晚，喺彌敦道452號嘅一幢大廈內，業主同3個朋友喺單位入面打緊麻將。其中一鋪有人食糊果陣，突然多咗對手出嚟問4個人收錢，同時仲有另一對手伸出嚟摸牌添！麻將台本嚟得4個人8隻手打牌，突然之間竟然多咗兩對手，變成12隻手，當堂嚇得4個人即刻逃出單位，驚到要報警求助。喺當年資訊無咁發達嘅年代，有人撞鬼撞到要報警，都咪話唔新鮮出奇。呢件事迅速傳開去，第二日竟然有成千人慕名而來要去睇「鬼」，事發單位嘅大廈即刻被一大班花生友包圍，卒之都要出動警方到場驅趕人群同維持秩序。

呢單撞鬼新聞嘅版本越傳就越多，都無一個最終定論，有說法就話其實事件係有租客唔滿意被逼遷，所以謠傳鬼怪事件，另有講法話係有人競投幢大廈但食白果，就散播鬼故嚟嚇窒啲中標人士，等佢哋唔夠膽收樓。

原圖嚟自網絡。